Lagwadloup, on tè a chanpyon
Rankont ispòtif a gogo
Lagwadloup ka menné vini ispòtif entèwnasyonal pou antréné é pou pwan dépa adan sé ripaj-la gras a pèwfòwmans réyèl a-y adan ispò é gras a konstriksyonman i ni onpil.
Adan sé gran rankont ispòtif lasa tini :
« La Route du Rhum », kous an lanmè ki ka ègzisté dèpi nanninannan « Le Tour cycliste international de la Guadeloupe » « Le Meeting international d'athlétisme de la Grande Caraïbe » « Le Tour de Guadeloupe de Voile Traditionnelle (TGVT) » « La Karujet » chanpyona entèwnasyonal off shore a jet skis « L’Open de Golf international Région Guadeloupe » Senfanswa
Mèt douvan kalité èksèpsyonèl ispòtif an-nou
Lagwadloup, jòdijou sé on tè a mètjwa toutmoun konnèt oliwon latè. Sé bon kalité èspésyal ispòtif an-nou pou mèt douvan douvan davwa sé on atou sèryé é konsayéla wouvè plis ankò. Toutfwazékant sèktè-la an soufwans pas pa ni asé ékipman pou ispò parapòt a gran kantité moun ki vlé fè ispò. Laréjyon Gwadloup ka pòté mannèv pou konblé sé mank-lasa. Dayépouyonn, dépi bon déotwa lanné, i la ka mèt bon kalité èspésyal ispò an-nou douvan douvan, ka wousouvwè gran sanblaj ispòtif é ka òwganizé on chay konpétisyon asi téritwa-la.
Ispò an chif 54 lig é komité réjyonal pou plis ki 70 000 lisans Omwens 16% lapopilasyon ka fè ispò adan klèb Lagwadloup sé on tè a mètjwa, lèwgadé kantité ispòtif gwadloupéyen ki fè pèwfòwmans kriyan mizi an mizi tan-la ka vansé. Lagwadloup ka wousouvwè rankont ispòtif osèryé osi.
Carifta Games (natation 2012 aux Bahamas) Karujet On Tè a chanpyon
Lè zòt gadé tan-la, i an favè an-nou, konstriksyonman i ni èvè gran kilti ispòtif an-nou ki an mèt, tousa ka pèwmèt wouvè lawonn si on palèt ispò kontèl atlétiz, kous an lanmè, ténis, chouval oben bisiklèt. Alòskifè, Lagwadloup ni on rènonmé sèryé pou « on tè a ispò » é « on tè a chanpyon » osi. Sé poulòsdonk ispò gwadloupéyen la, toupatou adan diféran domèn é diféran péyi ola sé ispòtif-la ka pòté koulè a bannzil an-nou anlè.
On foul chanpyon
Bannzil an-nou ni on mas ispòtif. Yo rivé montré fòs a-yo kisiswa onasyonal o menm a lentèwnasyonal.
Èdmon Roger Maurice, ki fèt Senklòd lè 20 novanm 1913, sé té on èspésyalis a kous a 100 mèt. An 1935, i té on chanpyon a fwans militè é inivèsitè. Men sé osi prèmyé gwadloupéyen ki pòté méday an jé zolenpik (JO) a Bèwlen an 1936.
Adan sé ipòtif-la moun konnèt plis la, ni :
sé kouwè-la : Mawlèn Canguio (1yé gwdloupéyèn ki ay o JO - Tokyo, an 1964), Rojé Bambuck, Marijozé Pérec, Patrisya Girard, Kristin Arron, Miryèl Hurtis on jidoka : Tédi Riner on mètamannyòk a sab : Lora Flessel sé foutbalè-la : Mariyis Trésor, Joslen Angloma, Lilyan Thuram, Tyéri Henry, Wilyam Gallas on jouwè tènis : Gayèl Monfils on bòksè : Janmak Mormek on kouwè bisiklèt asi pis : Grégori Baugé on andbalè : Didyé Dinart sé baskétè-la : Mikayèl é Floran Piétrus, Mikayèl Gélabale, èks. Lagwdloup, on tè plen chans pou fè tout sòt kalité ispò touléjou davwa ni solèy tout lanné-la, laliwonnaj-la kriyan kriyan kriyan, litoral-la pa menm palé tèlman i gran san konté tout konstriksyonman a-y. Bannzil an-nou sé on tè a ispò, i ka fè toutmoun plézi, kifèwvwè tan fè tan, i vin on pasaj oblijé é i divini on tè a chanpyon jòdijou. Lagwadloup pé konté si onlo adan sé ispòtif a-y la, mi sé sa yo montré. É sa kisiswa o réjyonal, kisiswa o nasyonal oben a lentèwnasyonal parapòt a gaz yo ni. Kisé pou chanpyon jòdijou, kisé pou chanpyon dèmen, fò sav, Lagwadloup ni sa kon tilili adan on pakèt domèn. Pou ba ispòtif an-nou plis pwa é plis prèstans, Laréjyon ka fè sé majò-la, séla ki pli fò la vin pou pwan ripaj èvè sé tan-nou la. Konsayéla, yo ké vwè fòs a-yo parapòt a sé entèwnasyonal-la.
