Omwens 3 000 lanné avan Jézi Kri fèt, okonmansman an Gwadloup sé mérendyen té ka viv la. Dayèpouyonn, anni gadé chay awkéoloji-la yo dékouvè la. Aprésa, sé Zendyen Arawak ki pwan plas an réjyon-la. On pèp agrikiltè é péchè trankil i té sòti Lorénòk (Vénézwéla). Malérèzman, koté VIIIè syèk la apré Jézi Kri, Zendyen Karayib ki sòti menm koté èvè Zendyen Arawak, éliminé-yo. Sé yo ki batizé Lagwadloup Karikéra, "L'île aux belles eaux" an langaj karayib.
An novanm 1493, Kristòf Colomb, on navigatè pangnòl débaké Sentmari, asi lilèt-la i nonmé Gwadloup la pou gloriyé monastè a "Santa Maria de Guadalupe d'Estrémadure". Kanmenmsa, a pa sé Pagnòl-la ki mèt lapat asi lilèt-la, 28 jwen 1635, men sé sé Fwansé-la aprédavwa yo té pwan lanmen si sé zendyen-la. Sé an tan-lasa, sé kolon-la chwazi kiltivé kann kon tilili. Pou yo té rivé about a lantoupriz a-yo lasa, yo té bizwen moun pou travay kifè, yo désidé ay chèché moun Lafrik Lwès, menné-yo é fè-yo èsklav Ozantiy.
An 1674, Lagwdaloup ka vin koloni a wayòm fwansé. É sé lamenm lékonomi a sistèm a plantasyon la ka pwan lanvòl é sé la osi lèsklavaj ka pwan lanmen koté 1685 anba lòpsyon a prèmyé Kòdnwè-la.
Pannan XVIIIè syèk la, Lagwadloup an boulvès. Sé sé Anglé-la ka gidonné Lagwadloup dèpi 1759 jis an 1763 (Lagè a sèt lanné la). Yo ka rann Lafwans li dapré trété Pari men sé Anglé-la ka woumèt lapat si péyi-la an 1794. É sé lè Viktò Hugues ki té on komisè konvansyonné a Larépiblik rantré opouvwa, i woupwan péyi-la é pwoklamé labolisyon a lèsklavaj. Kèk tan aprésa, Jénéral Richepance débaké an Gwadloup an 1802 anba lòpsyon a Bonaparte pou té woumèt lèsklavaj anwout. Dèlgrès, Ignace, Solitid é tout zanmi a-yo té la pou véyé pou yo té opozé-yo a Richepanse. Kifèvwè, dapré mannèv yo pòté, yo toujou ké rété dé min a nonm é fanm adan listwa a Lagwadloup.
Anfendéfen, yo fin pa aboli lèsklavaj silon lwa a 27 avril 1848, kon Viktò Schoelcher té ka mandé. Men sé déotwa mwa plita lèsklavaj bout poubon. An menm balan la, travayè vin ra asi sé plantasyon-la. Alòskifè, travayè ki sòti an End é ki té vlé vin, konmansé rantré koté mitan a XIXè syèk la.
Lwa a 19 maws 1946, déklaré Lagwadloup Dépawtèman Fwansé. Sé Anri Poignet ki rivé 1947 ki vin prèmyé préfé. An désanm 1982, Lagwadloup ka touvé-y sé on réjyon a onsèl dépawtèman.
Adan larèl a lwa konstitisyonnèl a 28 maws 2003 ki an rapò èvè òwganizasyon a désantralizasyon a Larépiblik, yo mandé popilasyon-la lidé a-y twa fwa lè 7 désanm 2003, an Gwadloup, a Senmawten é a Senbawtèlmi. Sé pou sav kay divini a Lagwadloup kisé pou chanjé èstati kisé pou lenstitisyon a kolèktivité lòtbò lanmè. Moun Senmawten é Senbawtèlmi voté wi an mas pou chanjé èstati a-yochak adan larèl a awtik 74 alakonstitisyon.
Sé Gwadloupéyen-la yo, yo di non pou onsèl asanblé vwè jou. Pannansitan, dé kolèktivité (COM) a Senmawten é Senbawtèlmi vwè jou asi lwa a 21 févriyé 2007.
